ఆధార్ నంబర్‌తో డబ్బులు డ్రా చేయొచ్చా?.. యూఐడీఏఐ ఏం చెప్పిందంటే..!

మారుతున్న డిజిటల్ యుగంలో ఆధార్ కార్డు అత్యంత కీలకమైన గుర్తింపు పత్రంగా మారింది. బ్యాంకు ఖాతాల నుంచి ప్రభుత్వ పథకాల వరకు ప్రతీదానికి ఆధార్ అనుసంధానం తప్పనిసరి కావడంతో దీని భద్రతపై ప్రజల్లో అనేక సందేహాలు వ్యక్తమవుతున్నాయి. కేవలం మన ఆధార్ నంబర్ తెలిస్తే చాలు, ఎవరైనా మన బ్యాంకు ఖాతా నుంచి డబ్బులు విత్‌డ్రా చేయగలరా? అనే ఆందోళన చాలామందిలో ఉంది. ఈ విషయంపై భారత విశిష్ట ప్రాధికార సంస్థ (యూఐడీఏఐ) స్పష్టతనిచ్చింది.

కేవలం ఆధార్ నంబర్ లేదా ఆధార్ అనుసంధానిత బ్యాంకు ఖాతా నంబర్ తెలిసినంత మాత్రాన ఎవరూ డబ్బులు తీయలేరని యూఐడీఏఐ స్పష్టం చేసింది. బ్యాంకు నుంచి డబ్బులు డ్రా చేయడానికి సంతకం, డెబిట్ కార్డు, పిన్, ఓటీపీ వంటివి ఎలా అవసరమో, అదే విధంగా ఆధార్ ద్వారా డబ్బులు తీయాలంటే మన వేలిముద్ర, కంటిపాప (ఐరిస్) స్కాన్ లేదా ఆధార్‌కు రిజిస్టర్ అయిన మొబైల్ నంబర్‌కు వచ్చే ఓటీపీ తప్పనిసరి అని వివరించింది. ఇప్పటివరకు కేవలం ఆధార్ నంబర్ దుర్వినియోగం కావడం వల్ల ఎవరికీ ఆర్థిక నష్టం జరగలేదని కూడా తెలిపింది.

ఏఈపీఎస్ స్కామ్‌తో అసలు ప్రమాదం
అయితే, ఆధార్ ఆధారిత చెల్లింపు వ్య‌వ‌స్థ‌ (ఏఈపీఎస్) ద్వారా జరుగుతున్న మోసాల పట్ల ప్రజలు అప్రమత్తంగా ఉండాలని నిపుణులు హెచ్చరిస్తున్నారు. సైబర్ నేరగాళ్లు ఆధార్ నంబర్‌తో పాటు మన వేలిముద్రలను కూడా సంపాదిస్తే, మన ప్రమేయం లేకుండానే బ్యాంకు ఖాతాను ఖాళీ చేసే ప్రమాదం ఉంది. దీనినే ఏఈపీఎస్ ఫ్రాడ్ అని పిలుస్తున్నారు.

మోసం ఎలా జరుగుతుంది?
సైబర్ నేరగాళ్లు వివిధ మార్గాల ద్వారా మన వేలిముద్రలను చోరీ చేస్తున్నారు. ముఖ్యంగా సబ్-రిజిస్ట్రార్ కార్యాలయాల్లోని ఆస్తి రిజిస్ట్రేషన్ పత్రాలపై ఉండే వేలిముద్రలను వీరు లక్ష్యంగా చేసుకుంటున్నారు. వాటిని సిలికాన్ లేదా జెల్‌పై కాపీ చేసి, మైక్రో-ఏటీఎం పరికరాల ద్వారా ఏఈపీఎస్ లావాదేవీలు జరుపుతున్నారు. ఈ మోసంలో మన మొబైల్‌కు ఎలాంటి ఓటీపీ రాదు. నేరుగా ఖాతా నుంచి డబ్బు డ్రా అయినట్లు మాత్రమే మెసేజ్ వస్తుంది.

ఆధార్‌ను ఎలా భద్రపరుచుకోవాలి?
1.బయోమెట్రిక్స్ లాక్: ఆధార్ దుర్వినియోగాన్ని అరికట్టడానికి యూఐడీఏఐ అందిస్తున్న అత్యంత ప్రభావవంతమైన సాధనం 'బయోమెట్రిక్స్ లాకింగ్'. యూఐడీఏఐ వెబ్‌సైట్ లేదా ఎం-ఆధార్ యాప్ ద్వారా మీ బయోమెట్రిక్స్‌ను లాక్ చేయవచ్చు. ఇలా చేస్తే, మీరు అన్‌లాక్ చేసేంత వరకు మీ వేలిముద్ర లేదా ఐరిస్‌ను ఎవరూ, ఎక్కడా ఉపయోగించలేరు.
2.ఓటీపీ, పిన్ పంచుకోవద్దు: యూఐడీఏఐ గానీ, బ్యాంకులు గానీ ఓటీపీ లేదా పిన్ వివరాల కోసం ఎప్పుడూ ఫోన్ చేయవు. ఇలాంటి కాల్స్ వస్తే వెంటనే కట్ చేయండి.
3.డాక్యుమెంట్ల విషయంలో జాగ్రత్త: ఆస్తి పత్రాలు వంటి ముఖ్యమైన డాక్యుమెంట్ల జిరాక్స్ కాపీలను అనవసరంగా ఎవరికీ ఇవ్వకండి. తప్పనిసరి పరిస్థితుల్లో ఆధార్ నంబర్‌ను మాస్క్ చేసి ఇవ్వడం మంచిది.
4.బ్యాంకు అలర్ట్స్: మీ ఫోన్‌కు వచ్చే బ్యాంకు మెసేజ్‌లను ఎప్పటికప్పుడు గమనిస్తూ ఉండండి. మీకు సంబంధం లేని లావాదేవీ ఏదైనా జరిగినట్లు గుర్తిస్తే వెంటనే బ్యాంకును సంప్రదించండి.